أمنيات مريض

صحيح إن الطب عجز قدام حالة المريض فى أيامه الأخيرة وأعلن إن مفيش خلاص علاج ينفعه. لكن ده مش معناه نسيب المريض يدخل فى دايرة من اليأس وانتظار الموت ويتخلى عن كل أحلامه وأمنياته ورغباته.

دور هوسبيس مصر إنه يحاول بكل طاقته علشان يحقق له ولو شوية من أمنياته اللى بتفكره بحياته قبل المرض وبتخفف من قسوته والامه.

والقصة اللى هنحكيها بتعبر عن ده :

دكتور كشف على مريض وكان تشخيصه لحالته إنها متأخرة جداً.

بعدها الدكتور زاره فى البيت علشان يتطمن عليه ويتابع حالته ، واتفاجىء بوجود عدد كبير من الحمام فى كل ركن فى البيت لأن هواية المريض ده كانت تربية أنواع كتيرة من الحمام .
الدكتور انزعج جدا وحذره إن وجود الطيور حواليه خطر جداً على صحته وممكن يتسبب فى تدهور أسرع لحالته. المريض استقبل كلام الدكتوربحزن شديد وصمت.

بنت المريض كانت موجودة معاه فى اللحظة ديه وحضرت الموقف . فطلبت من الدكتور بعد ما خلص كلام مع أبوها إنه يدخل أوضة تانية فى البيت من غير ما تشرح السبب. اندهش الدكتور من اللى شافه فى الأوضة ديه لما شاف متعلق على كل الحيطان نياشين وجوائز كتيرة. شرحت الابنة للدكتور إن كل حياة أبوها وكل متعته فى الدنيا بيلاقيها فى تربية الطيور وفى الاهتمام بيها .
الدكتور سكت شوية وبعدين قال لها إن الهواية ديه خطر عليه وممكن تعجل بوفاته.

ردت الابنة وقالت إن هى ديه حياته ، ولو حرمناه من هوايته اللى بتمثل أغلى حاجة عنده ، هيكون زى الميت حتى وهو لسه عايش .

ملخص الحكاية إنه مهما كانت صعوبة الظروف، سعادة الإنسان وجودة حياتهم حتفضل دايما هى الأهم .

محور خدمة الهوسبيس هو احترام رغبة المريض لأن الهوسبيس بيضيف حياة لأيامه اللي باقية ، مش مجرد أيام لحياته .