فرحة كريم

شهر رمضان له طعم ومكانة خاصة فى كل بيت مصرى . لأنه شهر الخير واللمة الحلوة اللى بتجمع شمل العيلة والأصحاب ، وتملا قلوبنا فرحة بذكريات حلوة ماتتنسيش .

علشان كدة فريق هوسبيس مصر فكرالسنة دى يتفاعل بشكل مختلف مع أسر المرضى بمناسبة رمضان ، لأن دور مشروع هوسبيس مصر مش بس مٌقتصر على خدمة المريض وتوفير إحتياجاته المختلفة اللى تناسب حالته ، إنما كمان نفسه يدخل الفرحة جوا كل بيت لأسرة مريض ولو بأبسط الطرق.

ابتدى الفريق يتحرك تجاه أسرة المريضة(أ) هى وحفيدها ( كريم ) اللى عمر 4 سنين تقريبا ، وهى بتحبه أكتر من نفسها وكل فرحتها انها تشوفه فرحان .

المريضة ( أ ) قالت للفريق فى التليفون إنها من زمان قوى مش بتحط زينة ولا بتعمل أى مظاهر احتفال برمضان.

علشان كده فريق هوسبيس مصراشترى الورق والأدوات اللازمة ، وفى الزيارة بعد ما اتطمن على صحة المريضة وأحوالها ، فضل يتكلم مع ( كريم ) ويضحك معاه ، ويعلمه ازاى يعمل زينة رمضان من الورق الملون.

( كريم ) كان مبسوط جدا إن فيه ناس حواليه جايه تلعب معاه وتشاركه فرحة رمضان ، ولما شاف الورق الملون والألوان قال إنه نفسه يعمل فانوس ، وفعلا دا اللى حصل ، مش بس كريم اللى كان فرحان وهو بيعمل معانا الفانوس اللى طلبه ، وبياخد معانا صور والفانوس فى إيده ، لكن فى الحقيقة كل البيت كان فرحان باللمة ، من أول جدته ،
لحد كل واحد من فريق العمل .

فريق هوسبيس مصر يومها فرحته كانت فرحتين . فرحة اننا قدرنا ندخل السعادة فى قلوبهم ، وفرحة تانية اننا شاركنا أسرة المريض بتفاعل جديد ومش تقليدى .

المريض وأسرته محتاجين للفرحة والضحكة تدخل بيتهم ..وانت بمساهمتك تقدر تساعد.

رمضان كريم .